UNI-VERSO

UNI·VERSO

Aparte di nos mishon i vishon nos a formulá un ambishon kolektivo huntu ku Fundashon Akohida Profeshonal pa Mucha. Akohida Arko Iris, Kolegio Rayo di Solo i Kolegio Strea Briante ta traha huntu pa realisá un sentro integral pa mucha: UNI·VERSO. Huntu nos a kuminsá den aprel di 2015 ku e trayekto akí. Empleado di e tres organisashonnan i otro benefisiario tabata enbolbí den e proseso i huntu nos a formulá e siguiente ambishon:
UNI·VERSO ta ofresé tur mucha ku ta bishitá e sentro un lugá sano. Komunikashon i kolaborashon entre e partnernan enbolbí ta habrí i transparente. Tin un kolaborashon intensivo entre akohida Arko Iris, Kolegio Rayo di Solo i Kolegio Strea Briante. E kolaborashon akí ta duna nos mucha- i empleadonan diferente oportunidat ku nos ke probechá al máksimo. E kolaborashon akí ta úniko.
E punto di salida ta, ku nos lo sigui karga e vishon pedagógiko komun akí ku tur esnan konserní, pa e motibu ei nos mester keda kòmbersá i dialogá, i keda hasi e preguntanan: nos sa ken nos ta, kiko nos ta hasi i dikon (ku kua meta)? E ora ei nos por pidi otro aklarashon riba nos responsabilidatnan i palabrashonnan hasí.