Strea Briante

Kolegio Strea Briante ta un skol pa alumno ku nesesidat spesífiko den enseñansa; ZML, ML i ZMO abreviashon na hulandes ku ta para pa: muchanan ku hopi difikultat pa siña i muchanan ku difikultat pa siña, muchanan difísil pa eduká. Tur alumno ta bon biní na Kolegio Strea Briante basta nos por ofresé enseñansa adekuá ku e medio- i personalnan disponibel, i por garantisá siguridat di e alumno mes, di otro alumno i di e personal . Huntu nos ta traha riba futuro di e alumno. Idioma di instrukshon di skol ta papiamentu di manera ku e alumnonan por ekspresá nan mes mihó.

Kolegio Strea Briante ta traha segun e metanan núkleo di SLO-TULE pa e idioma hulandes, matemátika, orientashon riba bo mes i mundu, orientashon artístiko i gemnastik. Na Kolegio Strea Briante nos ta usa e metanan núkleo pa duna enseñansa na midí pa kada alumno. Nos idioma di instrukshon ta papiamentu i pa esaki nos ta usa entre otro e métodonan Salto i Fiesta di Idioma. Ora e alumno ta asina leu pa siña un di dos idioma, nos lo duna lès di e idioma hulandes tambe.

Den grupo 7 nos ta duna lès di tráfiko, i den grupo 8 nos alumnonan ta partisipá den e programa di interes empresarial. Huntu ku esakinan nos ta siña nos alumnonan rèspèt pa himno i bandera, pendiente pa e programa pa formashon síviko ku OCW ta desaroyando. Tambe den grupo 7 nos ta duna lès di edukashon riba salú seksual i den grupo 8 lès di prevenshon di adikshon.Nos meta ta pa tur alumno yega e nivel di referensia mínimo 1F pa matemátika i e idioma hulandes. Eksperensia a mustra ku no semper tur alumno di Kolegio Strea Briante por yega e nivel 1F. Den e kasonan akí nos meta ta pa logra e nivel mas haltu posibel na kaminda pa e nivel 1F. Nos ambishon ta ku tur nos alumnonan ta yega por lo mínimo na nivel di grupo 6 di enseñansa regular ora ku nan pasa di Kolegio Strea Briante pa enseñansa avansá.

Nos enseñansa ta di tal manera organisá ku e alumno ta eksperensiá un liña kontinuo den su desaroyo. Enseñansa ta sinkronisá ku e avanse den e alumno su desaroyo. Kolegio Strea Briante ta usa e liñanan didáktiko pa determiná e metanan ku e alumno mester alkansá.

Skol tin e responsabilidat di krea un ambiente eskolar sano i sigur. Un ambiente sano na skol ta esensial i indispensabel pa e alumno por siña i pa e maestro por ehersé su profeshon debidamente, pa e motibu akí nos a formulá un protokòl kontra tèrmentu. Nos skol tin un tim di koordinadó di siguridat. E koordinadónan di siguridat ta konosí serka e alumnonan, i den tur klas i otro lokalidat di skol tin poster ku nan potrèt.

E direktor di Kolegio Strea Briante ta:
Sr. Remsley Nita

Download Guia di skol 2022-2023

Historia

A funda Kolegio Strea Briante na aña 1971 bou di e nòmber di Watapanaschool, pero el a bira operashonal na 1974. Di aña 1974 pa 1976 e skol tabata konsistí di dos klas di. Na 1977 a bini un klas mas aserka, i na aña 1979 a amplia Watapanaschool di 3 pa 4 klas. Na 1989 a sigui amplia ku un grupo di ZML (mucha ku hopi difikultat pa siña).

Watapanaschool tabata situá na Rincon-Sùit. Dia 1 di yanüari 2016 e skol a muda bai Playa pa ta spesífiko na Antriol banda di Kolegio Rayo di Solo.

For di promé di ougùstùs 2015 nos a kambia e nòmber di ‘Watapanaschool’ pa Kolegio Strea Briante. E motibu pa kambia e nòmber ta pasobra nos ta na kaminda pa un sentro integral pa mucha: UNI-VERSO huntu ku krèsh Arko Iris i Kolegio Rayo di Solo (ántes Kolegio Reina Beatrix). Esaki ta nifiká ku e krèsh, enseñansa básiko i enseñansa spesial pa alumno ku nesesidat di enseñansa spesífiko, tur ta bou di un dak i ku mes vishon pedagógiko pero kada organisashon ku su identidat.

Mishon

Na Kolegio Strea Briante kada mucha ta úniko. Nos ke ta un skol ku ta duna enseñansa na midí basá riba sirkunstansia di bida, un ambiente di sigur pa siña i ku bon strukturá. Asina e mucha por desaroyá su mes optimalmente di manera ku e por funshoná den komunidat.

Vishon

Skol ta guia e alumnonan ku nesesidat pa un enseñansa spesífiko un posibilidat mas grandi di independensia i abilidat pa nan mes yuda nan kurpa.

E tim di skol ta sostené i duna guia na e muchanan, kaminda mester pa nan ta den un bon direkshon. Nos ta enfoká/konsentrá riba e posibilidatnan individual i e nesesidatnan di enseñansa ku e alumno tin i ta yena e nesesidatnan akí mas mihó posibel.

Pa logra esaki mester tin un ambiente di siña den kual e alumno por sinti su mes sigur. Un ambiente di siña asina tin klaridat i kapasidat pa pronostiká, tempu, aktividat i estilo di guia. E kondishonnan akí ta esnan di mas elemental.

Traspaso di norma i balor, relashon, kompetensia i outonomia ta pa nos konseptonan básiko.

Vishon di enseñansa

Nos ke krea un klima di skol kla i pronostikabel. Aki den e alumnonan ta siña pa karga nan mes responsabilidat pa aportá na nan proseso di siña mas tantu posibel. Pa logra esaki nos ta traha segun un plan i adaptá e demanda di enseñansa riba nesesidatnan di e grupo i di e alumno individualmente. Tambe nos ta hasi uso di un sistema adekuá pa sigui desaroyo di alumno, plan di grupo i plan di akshon individual.

Nos ke hasi uso mas tantu posibel di ekspertisio eksterno pa yuda nos alumnonan optimalmente. Skol tin komo meta pa enbolbí e mayornan tambe den enseñansa di nan yunan.