Rayo di Solo
Kolegio Rayo di Solo ta un skol públiko di nivel básiko. Esaki ta nifiká ku nos skol ta aksesibel pa tur mucha sin distinshon di religion, kreensia, konvikshon filosófiko, rasa i/òf sekso. Aktualmente tin mas o ménos 370 alumno ta bishitá nos skol, total tin 16 grupo.
Pa e tim di Kolegio Rayo di Solo e mucha ta sentral. E kolaboradó- i trahadónan tin enseñansa na pechu. Nan ta trahadónan ku ta traha duru i no tin miedu di duna tur ku tin pa kada mucha individualmente.
Kolegio Rayo di Solo ta traha segun e metanan núkleo di SLO-TULE pa e idioma hulandes, matemátika, orientashon riba bo mes i mundu, orientashon artístiko i gemnastik. Huntu ku e métodonan nos skol tin diferente instrumento digital ku nos ta usa pa sostené nos enseñansa. Aparte di hulandes, tambe nos ta duna nos alumnonan papiamentu na skol. Aktualmente nos ta den e proseso pa modernisá nos método di matemátika i idioma.
Den grupo 7 nos ta duna lès di tráfiko, i den grupo 8 nos alumnonan ta partisipá den e programa di interes empresarial. Tambe den grupo 7 nos ta duna lès di edukashon riba .Huntu ku esakinan nos ta siña nos alumnonan rèspèt pa himno i bandera, pendiente pa e programa pa formashon síviko ku OCW ta desaroyando.
Nos ta sòru pa un liña kontinuo den enseñansa pa tur alumno pa medio di diferente aktividat edukativo adekuá i diferensiashon, ku yudansa di e métodonan.Nos meta ta, pa tur alumno yega e nivel di referensia mínimo 1F pa matemátika i e idioma hulandes. Tin alumno ku por mas ku esei i lo yega respektivamente na nivel 1S i 2F. Nos ta duna e alumnonan enseñansa pa nan por yega esaki sigur, aunke eksperensia a mustra ku no semper tur alumno di Kolegio Rayo di Solo por yega nivel 1F riba tur área. Pa e kasonan akí nos prosedura ta lo siguiente: maestro di e alumno en kuestion ta papia ku e guia interno pa huntu nan traha un plan pa yuda e alumno
Skol tin e responsabilidat di krea un ambiente eskolar sano i sigur. Un ambiente sano na skol ta esensial i indispensabel pa e alumno por siña i pa e maestro por ehersé su profeshon debidamente, pa e motibu akí nos a formulá un protokòl kontra tèrmentu. Nos skol tin un tim di koordinadó di siguridat. E koordinadónan di siguridat ta konosí serka e alumnonan, i den tur klas i otro lokalidat di skol tin poster ku nan potrèt.
Historia
A funda nos skol na aña 1848 bou di e nòmber Landschool .
Dia 16 di mei 1939 Landschool a bira e promé skol públiko na Boneiru, bou di e nòmber Prinses Beatrixschool, ku 16 alumno inskribí.
Sèptèmber 1951, skol Prinses Beatrix tabata situá den e edifisio ku anteriormente tabata kazèrne di Boneiru. Den e époka ei un skol preparatorio tambe tabata forma parti di Prinses Beatrixschool.
Na aña 1974 e skol a muda pa e edifisio nobo den Amboina, e skol tabata konsistí di 10 klas. E skol preparatorio no a muda bai Amboina, pero a keda den e edifisio ku anteriormente tabata kazèrne. Na ougùstùs 1980 a amplia e skol ku 2 klas, un di nan tabata pa e parti preparatorio, lushi. Despues a amplia e skol preparatorio ku mas ku 40 mucha. Na aña 1998 e skol preparatorio a krese i yega un total di 6 klas, e tempu ei bou di e nòmber Kolegio Reina Beatrix. Na aña 2002 e skol preparatorio i e skol básiko a bira un skol pa Enseñansa di Fundeshi ku 2 siklo. E promé siklo tabata grupo 1 te 4 i e di dos siklo tabata grupo 5 te 8. Na aña 2007 a amplia e skol ku un edifisio multifunshonal ku a duna posibilidat pa e parti edukativo i kultural.
- Na aña 2014 Kolegio Reina Beatrix a selebrá su 75 aniversario.
- For di promé di ougùstùs 2015 a kambia e nòmber di Kolegio Reina Beatrix pa
- Kolegio Rayo di Solo. Motibu pa e kambio di nòmber ta pasobra nos ta na kaminda pa un sentro integral pa mucha: UNI-VERSO huntu ku Krèsh Arko Iris i Kolegio Strea Briante, anteriormente Watapanaschool. Esaki ta nifiká ku e krèsh, enseñansa básiko i enseñansa spesial pa alumnonan ku nesesidat di enseñansa spesífiko, tur ta bou di un dak i ku mes vishon pedagógiko, pero kada organisashon ku su identidat.
Mishon
Nos meta ta pa duna oportunidat igual na kada mucha. Nos ta duna nos alumnonan enseñansa segun nan nesesidat ku énfasis riba e abilidatnan ku siglo 21 ta eksigí. Nos ta prepará nos alumnonan pa funshoná den komunidat komo un siudadano bon i responsabel. Nos ta hasi esaki kreando un ambiente di rèspèt mutuo, unda ta traha huntu riba futuro.
Vishon
Nos ta un skol unda kada alumno por ta nan mes. Nos ta traha riba formashon integral di nos alumnonan ofresiendo nan abilidat di siglo 21, stimulando nan kreatividat, i yudando nan desaroyá nan abilidat pa karga responsabilidat i sali pa nan mes. Esaki nos ta hasi trahando huntu, ku rèspèt mutuo i den un ambiente sigur.