Kolegio

Fakansi di skol

Dia di estudio:

  • 2 di desèmber 2022
  • 16 di desèmber 2022
  • 17 di febrüari 2023
  • 26 di mei 2023
  • 30 di mei 2023
  • 7 di yüli 2023

* E dianan di fiesta akí ta kai den wikènt

Último dia di skol promé ku fakansi grandi 2022 ta djabièrnè 7 di yüli 2023

Promé dia di skol despues di fakansi grandi 2022 ta djaluna 21 di ougùstùs 2023

Último dia di trabou promé ku fakansi grandi 2022 (pa personal di sosten) ta djabièrnè 14 di yüli 2023

Promé dia di trabou despues di fakansi grandi 2022 ta djaluna 14 di ougùstùs 2023

Aspekto práktiko

Orario di skol

Tur dia skol ta kuminsá di 7.30 am i ta terminá 12.30. E klasnan ta habri 7.15. Ora ku e muchanan yega skol, nan mester bai nan klas. Amigablemente, nos ta pidi e mayornan ku ta trese nan yu(nan) skol pa ta na tempu. Asina por despedí di e yu promé ku kuminsá ku lès, i e lèsnan por kuminsá na tempu.

Tin vigilansia riba tereno di skol promé i despues di ora di skol (for di 7.00 di mainta te 1.00 or di mèrdia). Nos ta urgi tur mayor pa bin buska e yu promé ku 1.00 or di mèrdia.

Fakansi i dianan di estudio

Klek aki pa e skema di fakansi i dianan di estudio

E tim

Na nos skol ta traha ku un tim dinámiko ku ta hasi esfuerso pa enseñansa di nos muchanan.

Kada un ta hasi esaki den nan tarea òf funshon. Nos tin grupo di maestro, asistente di maestro, terapeuta artístiko, kòki, guia interno i un direktor. Huntu ku esaki tin un manager di ofisina, kuidadó interior i personal di mantenshon. E tim akí ta dediká hopi tempu pa siña for di otro. Enseñansa ta kambia konstantemente. Pa por sigui ku e desaroyonan akí nos personal ta haña regularmente dianan di rekapasitashon.

Dato di alumno

For di inskripshon ta traha un fail di kada mucha. Den e fail ta warda dato personal, evaluashon di alumno, kòmbersashon ku mayor, tèst spesial, prueba i dato di rapòrt.

Pa lei, nos ta obligá di kompilá di kada alumno un gran kantidat di dato, i nos ta obligá na warda e datonan akí pa un kantidat di aña.                                                   

Kòmbersashon ku mayor/Anochi di informashon

Maestro di klas ta invitá tur mayor mínimo dos bes pa aña pa bin kòmbersá tokante di desaroyo den siñamentu di nan yu(nan).

Tambe ta invitá e mayor(nan) na un kòmbersashon pa trata e muchanan ku tin mester di atenshon spesial. Den kaso ku e mayor(nan) no por ta presente, nan por laga un otro persona representá nan. Ta duna e persona un apoderashon por eskrito firmá pa e mayor/mayor di kriansa.

Un biaha pa aña ta organisá un anochi di informashon tokante enseñansa di e grupo konserní. Naturalmente no ta papia tokante alumno individual riba e anochi ei.  Ta duna informashon general di e aña eskolar i di e grupo.

Kontribushon boluntario di mayor

Enseñansa ta grátis i komo mayor bo no mester paga skol, pero nos lo apresiá un kontribushon boluntario pa kubri sierto gastu. Ta trata di e suma di máksimo di $30, -. Por hasi e kontribushon efektivo (den un òf mas término) òf por transferí e montante total riba nos kuenta na MCB bou di e number 407.040.02 na nòmber di Kolegio Rayo di Solo, òf nos kuenta na MCB ku e number 407.041.00 na nòmber di Kolegio Strea Briante. Esaki ku spesifikashon di nòmber di e yu(nan) i e grupo. Nos lo usa e sèn akí pa aktividat pa alumno i pa meta deportivo. Por ehèmpel pa haña i laba unifòrm, kumpra algu di kome i bebe ora tin aktividat spesial, etc.

Unifòrm di skol

Alumnonan mester bini skol ku polo di skol. Ta bistié ku un djins. Ta prohibí pa bin skol ku kadena òf armbant diki i pisá. Mucha hòmber no por bisti renchi di orea riba tereno di skol.  Por haña nos polo na e kompania: Mister & Miss Exclusive Bonaire.

Pa loke ta trata higiene durante e parti práktiko den kushina e alumno mester tin un djins largu bistí. Banda di esei e uñanan mester ta kòrtá i limpi.

E alumno mester bisti unifòrm di gemnastik dia ku e tin gemnastik. E unifòrm di gemnastik tambe ta optenibel na Mister & Miss Exclusive Bonaire.

 

Inskripshon

Kolegio Rayo di Solo

Si bo yu ta bai skol pa promé biaha mester registrá e yu riba e wèpsait (https://aanmeldenbasisonderwijsbonaire.com/) na momento ku e yu tin 3 aña.Pa registrá na enseñansa básiko ta nesesario hasi esaki pa e muchanan ku ainda no a hasi 4 aña.

Pa inskribí e yu na skol mester di:

  • Un legitimashon bálido manera un sédula òf pasport;
  • Buki di kasamentu òf buki di famia;
  • 2 pasfoto resien di bo yu(nan);
  • Dokumento di ènter;
  • Rapòrt pedagógiko didáktiko ( den kaso ku bo yu (nan) a bishitá otro skol òf krèsh )

Si bo yu no ta na Boneiru (ainda) tambe bo ta obligá pa kumpli ku e eksigensianan ariba menshoná. Si bo no tin un di e datonan akí ora di inskripshon, e ora ei bo no por inskribí.

Si e yu ya ta bishitá otro skol (e yu tin 4 aña òf mas) por tuma kontakto ku skol pa inskribí e yu. Pa inskribí e yu mester di e mes dokumentonan ariba menshoná. Adishonalmente mester di un prueba ku a kita e yu for di e skol ku e tabata bishitá.

Kolegio Strea Briante

Por inskribí un alumno na Kolegio Strea Briante solamente despues ku skol mes a manda e yu Kolegio Strea Briante i/òf na momento ku EOZ a duna esaki komo konseho. Despues di investigashon di EOZ por sali na kla ku un alumno tin problema pa siña i pa e motibu akí lo e tin benefisio na un enseñansa mas personalisá  den grupo chikí. Dependiente di e alumno su nesesidat, Kolegio Strea Briante por ta e mihó skol p’e.

Pa inskribí e yu mester di:

  • Un legitimashon bálido, manera un sédula òf pasport;
  • Buki di kasamentu òf buki di famia;
  • 2 pasfoto resien di bo yu(nan);
  • Dokumento di ènter;
  • Rapòrt pedagógiko – didáktiko ( den kaso ku bo yu (nan) a bishitá otro skol òf krèsh )
  • Prueba ku a kita e yu for di e skol ku e tabata bishitá
  • Rapòrt di EOZ

Enseñansa obligatorio

Lei di enseñansa obligatorio di e islanan BES ta stipulá ku un mucha ta obligá di bai skol frekuentemente. E reglanan di e lei akí ta konta pa mucha entre 4 pa 18 aña di edat i ta na vigor for di 1 di yanüari 2011.

Den e lei ta stipulá tur obligashon i regla pa mayor i tutor, manera por ehèmpel:

  • Inskripshon di e yu na skol
  • Sòru pa e yu bai skol tur dia

Den lei di enseñansa obligatorio di islanan BES tin pará ku e direktor mester tin un bista skèrpi riba kumplimentu ku e lei, i pa kada ferlòf pidí mester konsultá por eskrito ku e ámtenar konserní .

For di 4 aña e yu ta kai bou di enseñansa obligatorio. Enseñansa obligatorio ta enserá, ku e yu tin fakansi solamente riba e dianan ofisialmente liber di akuerdo ku e roster di fakansi i / òf ferlòf ora ku direktiva di skol duna esaki.

Ferlòf di fakansi

Pa ferlòf fuera di e dianan normal, mester entregá un petishon mínimo 1 luna promé na direktor di skol. Esaki mester sosodé por eskrito. Ta honra e petishon akí solamente ora ku debí n’e trabou di un di e mayornan ta hasi ku e mayor por tuma fakansi solamente fuera di e fakansi di skol. Mester entregá un deklarashon di doño di trabou kaminda ta indiká ku no ta posibel pa e persona konserní haña ferlòf denter di e dianan ofisial di fakansi di skol.

E ferlòf di fakansi ta:

  • konsedé únikamente un bes pa aña eskolar;
  • dura 10 dia òf ménos;
  • despues di e promé dos simannan di lès di e aña eskolar.

E ferlòf di fakansi no por:

  • ora ta trata di un di dos fakansi (tin oportunidat pa bai ku fakansi durante otro fakansinan di skol.);
  • ora ke bai ku fakansi un òf mas dia promé ku fakansi ofisial di skol òf ta bin bèk despues ku e fakansi ofisial di skol a terminá.

Ferlòf en konekshon ku sirkunstansianan eksepshonal.

Mester entregá petishon pa ferlòf bou di sirkunstansianan di peso na e direktor pa e evaluá esaki promé ku òf denter di dos dia ku e sirkunstansia akí a presentá.  

Sirkunstansianan di peso por ta:

  • Pa asistí na un kasamentu di un famia serka òf famia djaleu te di 3 grado.
  • Fayesimentu di famia i pariente
  • Pa aniversario di trabou i/òf aña kasá di mayor, wela i tawela.
  • Pa otro kaso ku segun desishon i huisio di e direktor ta konsiderá komo motibu importante, pero no ferlòf di fakansi.

Reglamentu di Keho

Tur skol ta trata di logra un bon kontakto ku tur mayor. Sinembargo, por sosodé ku, komo mayor, bo tin opinion diferente for di esun di e maestro di bo yu òf ku gerensia di skol. Esaki por trese kuné ku bo ke entregá un keho, i ta bon pa bo sa unda bo por trese esaki dilanti.

Prosedura ku mester sigui ora di keho:

  1. Ta bai serka maestro di e yu i purba di ekspresá e kestion i yega na un solushon aseptabel.
  2. Si e kòmbersashon akí no a yega na un solushon satisfaktorio, òf ora/den kaso ku tin keho kontra di gerensia, por trese e keho dilanti serka Direktiva di Skol. Aki lo nos ta purba di yega na un solushon aseptabel.
  3. Si e kòmbersashon akí no hiba na un solushon satisfaktorio, por duna keho por eskrito na direktiva. Esaki ta duna un veredikto despues di a tende tur partido. Por dirigí e karta na: Stichting Openbaar Onderwijs Bonaire, n. a.d. Sra. Saby de Bies.
  4. Si no ta konforme ku e veredikto di direktiva, finalmente por aserká “Klachtencommissie Onderwijs BES”.

E komishon ta konsistí di:

1

Sr. mr. Anthony Nicolaas (Boneiru) – anicolaas@nicolaaspartnerslaw.com

2

Sr. Menno van der Velden (Saba) – menno@sabagov.nl

3

Sr. Rene Reehuis (St. Eustatius) – rene.reehuis@gmail.com

Pa mas informashon di e prosedura di keho por klek aki, pa konsultá e website di OCW den Hulanda Karibense (CN) òf por tuma kontakto ku sra. Maritsa Silberie via maritsa.silberie@rijksdienstcn.com

Finalmente, nos ta spera sinseramente ku lo bo no tin nodi di hasi uso di e reglamentu akí nunka.