Historia di skol

A funda Kolegio Strea Briante na aña 1971 bou di nòmber di Watapanaschool. El a bira operashonal na aña 1974. Di aña 1974 pa 1976 e skol tabatin 2 klas. A bin un klas mas aserka na aña 1977.  Na 1979 el a ekspandé di 3 grupo na 4 grupo.  Na aña 1989 a sigui ekspand’é ku un grupo di ZMLK (muchanan ku hopi difikultat pa siña).

E tempu ei, skol tabata situá na sùit di Rincon. Rincon ta e bario di mas bieu di Boneiru. E ta keda 15  minüt di kore for di Kralendijk e kapital di Boneiru. Den e bario akí tin un skol básiko, un akohida despues di skol pa mucha i un akohida pa kuido di esnan deshabilitá. Nos a muda na yanüari 2016 pa Playa na Antriol Pariba banda di Kolegio Rayo di Solo.

Kolegio Strea Briante ta un skol ku ta brinda enseñansa spesial na alumnonan ku un nesesidat di enseñansa spesífiko.  Na momentu ku un alumno no por òf no por sigui mas ku enseñansa ku skol regular ta brinda , skol por laga tèst e alumno. Via Expertischecenter Onderwijs Zorg (EOZ) por rekomendá e alumno pa bai Kolegio Strea Briante.

Entrante promé ougùstùs 2015 Watapanaschool a kambia nòmber i bira Kolegio Strea Briante. E kambio di nòmber ta relashoná ku koperashon ku nos tin pa traha huntu ku pasadia pa mucha Arko Iris i Kolegio Rayo di Solo (anteriormente Kolegio Reina Beatrix).  Huntu nos ta traha riba un sentro pa mucha intregral UNI-VERSO.  E tres institushonan akí ta situá huntu, banda di otro, riba e mesun tereno. Esaki ta brinda mas posibilidat pa desaroyo di nos muchanan.

Nos ta un famia - Ban p'e ku alegria